रियल मड्रिडले घरेलु मैदानमै जित्न सकेन, रोनाल्डो चुके

एजेन्सी / रियल मड्रिडले अंक दूरी बढाउँदै स्पेनिस ला लिगाको शीर्ष स्थानमा कायम रहने मौका गुमाएको छ । ला लिगा अन्तर्गत आइतबार राति भएको खेलमा रियल मड्रिड एइबरसँग १–१ को बराबरीमा रोकिएर अंक बाँड्न बाध्य भयो । ला लिगामा रियल मड्रिडले लगातार तीनमा जित निकाल्न सकेको छैन । पछिल्ला तीन खेलमा बराबरीमा रोकिएको रियल मड्रिडको अपराजित यात्रा भने कायम छ । राति भएको खेलमा छैटौं मिनेटमा रिको कास्ट्रोले एइबरलाई अग्रता दिलाए ।

१७ औं मिनेटमा ग्यारेथ बेलले रियल मड्रिडका लागि बराबरी गोल फर्काए । त्यसपछि दुवै तर्फबाट गोल हुन सकेन र खेल बराबरीमा सकियो । यो खेलमा क्रिष्टियानो रोनाल्डोले गोल गर्ने राम्रो मौका बनाएपनि गोल भने गर्न सकेनन् । घरेलु मैदानमा भएको खेलमा रियल विजयी हुन सकेन । बराबरीपछि सात खेलबाट १५ अंक भएको रियल मड्रिड दोस्रो स्थानमा झरेको छ । रियल मड्रिड गोल अन्तरका आधारमा दोस्रो स्थानमा झरेको हो । रियल मड्रिड च्याम्पियन्स लिग अन्तर्गत बोरुसिडा डर्टमुण्डसँगको खेलमा पनि बराबरीमा रोकिएको थियो ।